Quedo nel pueblu

La mazana de mesa asturiana busca abrir el so buecu nel mercáu.

“Queremos sacar una de bona calidá, intentar recuperar la nuesa”, esplica Isabel Rubio, nueva entamadora rural con una finca familiar con arándanos, fabas y aguacates. Isabel Rubio García-Braga ye una entamadora rural que tresmite, dende’l primer momentu, el prestu que siente col so trabayu. Con doble llicenciatura n’Alministración y Dirección d’Empreses y Económiques y con un Master en Hospitality Management, dempués de tar trabayando 13 años nel estranxeru va tiempu yá que s’incorporó en San Cosme (San Martín de Luiña) a trabayar n’una finca onde los sos padres habíen plantáu arándanos y fabas, una actividá que, amás de convertise col tiempu nel so trabayu ye, al tiempu, tamién la so pasión.

“Yo toi encantada de tar equí. Amás, cola tema de la pandemia, a la fin axuntamos equí tola familia. Pela mio parte apocayá merqué una casina en Prámaro y toi a 700 metros de la finca”, señala esta nueva entamadora que, echando la vista tras, sabe que lo collechao nel pasáu sirve pa siguir alantre nel futuru.

“Cuando llegué dediqué primero a los arándanos, tenemos una hectárea plantada con 2.500 plantes; comercialización, redes sociales, movete pela zona pa ufiertar el productu y tamién na recoyida, y aína incorporé tamién cola faba asturiana, dientro de la IGP Faba d’Asturies”. Col nome de Finca’l Ribeiro, la producción media envasada como categoría extra ronda los 1.000 quilos añales. “Nos últimos años hemos aumentar el plantíu con una hectárea colo qu’esperamos producir redolada a los 1.700 a 1.900 quilos de fabas”, esplica.

Ella puntualiza, de siguío, que “anguaño tán en procesu de conversión a ecolóxicu toes los plantíos colo que la nuesa primer collecha de faba ecolóxica va ser pa 2023. El nuesu proyectu foi siempres tener una finca agroecológica, y nellos tamos, trabayando nello con muncha ilusión y con munches ganes”.

Esta entamadora rural recuerda que, anque la pandemia afectó fuertemente a la hostelería, nel so casu esi efectu nun foi acusáu. “Siempres vendimos muncho a tiendes y supermercaos onde la xente merca nuesa faba”. Y como el campu pide evolución y ella ye muyer inquieta y en cuntasti evolución y aprendizaxe, tamién tien en marcha una plantíu de pumares de mesa.

“Llantamos unos 300 pumares, pero perdimos munchos colos jabalíes, que volvimos a replantar. Vas a los supermercaos y nun atopes mazana asturiana de mesa, toes son de fora. Nós queremos sacar una mazana bona, d’alta calidá, anque sía poca producción, pero intentar recuperar la nuesa. Llantamos diez variedaes: mingan, prima, priscilla, dayton, liberty, williams pride, florina, reineta encarnada, reineta colorada y goldrush. El problema que tien la nuesa mazana ye la so introducción nel mercáu a un preciu competitivu”.

Nun queda ende la cosa. N’adquiriendo nueves finques la selmana que vien empecipia tamién el plantíu d’aguacates, llantando un total de 900 árboles de les variedaes hass y bacon. “A ver cómo se nos da, yo espero que bien, esta vega ye bien fértil. Venimos controláu los dos últimos años la temperatura y el mugor y tamos convencíos de poder sacar alantre esti nuevu plantíu”, afirma.

Isabel Rubio, que ta en contactu con otru entamadores rurales, cree que “güei día nel campu hai xente bien cualificada trabayando colos sos proyectos na zona rural. Cada vez son más los que lleguen buscando vivir con más tranquilidá y teniendo la so propia empresa. Yo creo que l’agricultura tien futuru n’Asturies. Yo toi equí, dedicada a ella, y non pienso dir”.